Palli á Grænlandi

Ómar Óskarsson ljósmyndari Morgunblaðsins tók þessa frábæru mynd af Páli Gunnarssyni á Grænlandi 2003.

Þá skipulögðu Hróksmenn fyrsta alþjóðlega skákmótið í sögu Grænlands.

Páll tefldi að sjálfsögðu á mótinu og stóð sig með sóma.

 

Fleiri fréttir birtast á næstu dögum frá Minningarmóti Páls Gunnarssonar í Djúpavík, og hátíðinni í Árneshreppi. 

Við vekjum athygli á frábærri grein Helga Ólafssonar í Morgunblaðinu í dag, þriðjudag, og hvetjum Djúpavíkurfara til að senda okkur línu, til birtingar á heimasíðunni okkar, í [e-mail]

Henrik sigraði í Kaffi Norðurfirði

Stórmeistarinn Henrik Danielsen sigraði á hraðskákmóti Hróksins í Kaffi Norðurfirði á þriðja og síðasta degi skákhátíðar í Árneshreppi.

34 keppendur mættu til leiks í Kaffi Norðurfirði, nýjum veitingastað í Árneshreppi sem opnaði 17. júní. Henrik, sem var stigahæstur, leyfði aðeins eitt jafntefli; gegn alþjóðameistaranum Arnari Gunnarssyni. Einar Valdimarsson deildi 2.-3. sæti með Arnari og er það skemmtilegur árangur hjá þeim harðsnúna skákmanni.

Henrik hlaut peningaverðlaun fyrir sigurinn og hina glæsilegu ljósmyndabók Sigurgeirs Sigurjónssonar, Hestar, sem er nýkomin út hjá Forlaginu.

Vel fór um keppendur í Kaffi Norðurfirði, enda ilmandi vöfflur og fleira góðgæti á boðstólum. Staðarhaldarar, Edda Hafsteinsdóttir og Guðlaugur Ágústsson, fengu taflsett að gjöf í tilefni af opnun staðarins og því geta skákmenn jafnan tekið eina bröndótta þegar leiðin um Strandir.

Og það verður áreiðanlega fyrr en síðar: Skákhátíðin í Árneshreppi 2008 lukkaðist frábærlega, og þegar hefur verið ákveðið að endutaka leikinn á næsta ári.

Lokastaðan í hraðskákmóti Hróksins í Kaffi Norðurfirði:

1. sæti: Henrik Danielsen 5,5 vinningar 2.-3. sæti: Arnar Gunnarsson, Einar Valdimarsson 5 vinninga 4.-10. sæti: Páll Sigurðsson, Svanberg Pálsson, Nökkvi Sverrisson, Einar K. Einarsson, Ingþór Stefánsson, Kjartan Guðmundsson, Pétur Atli Lárusson 4 vinninga 11.-12. sæti: Sigurður Sverrisson, Eiríkur Björnsson 3,5 vinning 13.-22. sæti: Hrannar Jónsson, Halldór Blöndal, Sverrir Unnarsson, Pétur Blöndal, Kormákur Bragason, Hreinn Ágústsson, Gunnar Nikulásson, Ægir Ingólfsson, Lilja Grétarsdóttir, Arnar Valgeirsson 3 vinninga  23.-24. sæti: Paulus Napatoq, Róbert Ingólfsson 2,5 vinning 25.-29. sæti: Ingólfur Benediktsson, Kristján Albertsson, Guðmundur R. Guðmundsson, Sóley Pálsdóttir, Björn Torfason 2 vinninga 30.-32. Júlíana Guðlaugsdóttir, Guðmundur Jónsson, Andri Thorstensen 1,5 vinning 33.-34. sæti: Númi Ingólfsson, Ásta Ingólfsdóttir 1 vinning.

Ættjarðarlögin ómuðu í veislulok

Síðasta atriðið á Skákhátíð í Árneshreppi var sannarlega glæsilegt: Gamlir Fóstbræður þöndu raddböndin á bryggjunni í Norðurfirði undir glampandi sól fyrir stóran og þakklátan hóp áheyrenda.

Ættjarðarlögin nutu sín einstaklega vel með fjöllin í Trékyllisvík í bakgrunni, hvert öðru tignarlegra.

Jónas Ingimundarson stjórnaði kórnum, sem kom gagngert til að slá botn í skákhátíðina, og fór á kostum milli laga.

Óhætt er að segja að kórinn hafi unnið hug og hjörtu allra viðstaddra, og vonandi er þetta aðeins fyrsta heimsóknin af mörgum í Árneshrepp.

Meistarar úr öllum áttum

Árný Björnsdóttir frá Melum stóð sig með miklum sóma á Minningarmóti Páls Gunnarssonar í Djúpavík. Hér stýrir hún hvítu mönnunum gegn Guðmundi í Stóru-Ávík, og lyktaði skákinni með jafntefli eftir sviptingar.

Við hlið hennar situr Stefán Herbertsson og teflir við Paulus Napatoq, heiðursgest hátíðarinnar. Þar hafði Paulus öruggan sigur.

 

Bestu kleinur í heimi

Jóhanna í Árnesi sá um veitingasöluna í skákhöllinni í Djúpavík, og er óhætt að segja að kleinurnar hafi sérstaklega slegið í gegn.

Allur ágóði af sölunni rann í ferðasjóð nemenda í Finnbogastaðaskóla.

Vaskir piltar

Hér eru nokkrir harðsnúnir. Fremst sitja Kjartan Guðmundsson og Grímur Grímsson, þar sem Grímur hafði sigur eftir harðan atgang.

Einar K. Einarsson lagði listamann hátíðarinnar, Kormák Bragason. Einar vann góðan sigur í flokki skákmanna með minna en 2200 stig, og sigraði meistarana Róbert Harðarson og Jakob Vang Glud.

Við enda borðsins grillir í Hrannar Jónsson, sem tefldi af alkunnri einurð og festu.

Halldórar horfa á meistara

Halldór Blöndal og Halldór Jón Kristjánsson bankastjóri niðursokknir í taflmennsku Helga Ólafssonar.

Áhyggjur af ástandinu í kauphöllum heimsins gufuðu upp í skákhöllinni við ysta haf.

 

Á sama tíma að ári

Eva hótelhaldari í Djúpavík tók vel á móti gestum skákhátíðarinnar, og allt gistirými í gamla síldarþorpinu var notað.

Hótel Djúpavík er tvímælalaust eitt skemmtilegasta hótel á landinu, og þótt víðar væri leitað.

Eva og Ásbjörn staðarhaldari unnu ötullega að undirbúningi stórmótsins og leystu öll mál sem leysa þurfti.

Þegar er byrjað að undirbúa skákhátíð í Djúpavík 2009...

Fjórir góðir og íslenski fáninn

Bræðurnir Róbert og Númi Ingólfssynir úr Árnesi eru vaskir skákmenn. Hér hefur hvíta drottningin ráðist inn í herbúðir Guðmundar Guðmundssonar, sem fær áfallahjálp frá áhorfanda.

Skákmaðurinn efnilegi úr Eyjum, Nökkvi Sverrisson, sem hreppti 2. sætið í flokki grunnskólabarna, fylgist með.

Tvöfaldur sigur Björns á Melum

Björn Torfason bóndi á Melum var eini tvöfaldi sigurvegarinn í Djúpavík. Hann varð efstur í flokki stigalausra skákmanna, sem og í flokki Strandamanna.

Skæðasti keppinautur Björns var Ingólfur Benediktsson í Árnesi, sem varð í 2. sæti í báðum flokkunum.

Aðrir heimamenn á mótinu voru Kristján Albertsson, Róbert Hlífar Ingólfsson, Númi Ingólfsson, Árný Björnsdóttir, Guðmundur Jónsson, Guðmundur Þorsteinsson, Ásta Þorbjörg Ingólfsdóttir.