Best klæddi keppandinn

Guðfríður Lilja Grétarsdóttir hlaut sérstök verðlaun fyrir að vera best klæddi keppandinn, að mati sérstakrar dómnefndar.

Í umsögn dómnefndar sagði að klæðnaður Lilju væri í senn þjóðlegur og frumlegur, en jafnframt mjög hentugur til taflmennsku í gamalli síldarverksmiðju.

Róbert afhenti Lilju verðlaunin undir dynjandi lófaklappi.

Á myndinni er Lilja með verðlaunin, ljósmyndabókina Hestar eftir Sigurgeir Sigurjónsson.

Skrafað á skákþingi

Halldór Blöndal, fv. forseti Alþingis, sagðist hafa teflt á fjórum eða fimm skákmótum um ævina. Þau hefðu verið haldin á Raufarhöfn, Grímsey, Grænlandi og nú í Djúpavík.

Halldór var um árabil vaskasti skákmaður Alþingis. Hann er sóknarskákmaður og eru jafnan eldglæringar á borði hans.

Hér spjallar Halldór við Jón Guðbjörn Guðjónsson, veðurathugunarmann og fréttaritara Árneshrepps. Á milli þeirra er Guðmundur Jónsson í Stóru-Ávík, sem virðist hugsa sitt.

Heiðursgesturinn okkar

Paulus Napatoq kom um langan veg til Djúpavíkur. Hann býr í nyrsta þorpi Austur-Grænlands, þar sem 800 kílómetrar eru í næstu byggð.

Paulus var heiðursgestur á Minningarmóti Páls Gunnarssonar í Djúpavík og mætti til leiks ásamt skólastjóranum sínum, Peter von Staffeldt.

Hann hefur verið blindur frá fæðingu en lærði að tefla í fyrra, þegar liðsmenn Hróksins heimsóttu þorpið hans. Síðan hefur Paulus náð frábærum árangri, sérstaklega eftir að hann fékk sérstakt blindratafl.

Paulus tefldi 5 skákir á mótinu og fékk 3,5 vinning. Hann vann 2, gerði 3 jafntefli og tapaði engri skák!

Þeir Peter og Paulus búa í góðu yfirlæti á Melum, meðan á dvöl þeirra í Árneshreppi stendur.

Í lokaathöfn Minningarmóts Páls Gunnarssonar var Paulus færð vegleg gjöf frá 66° Norður, sem mun örugglega koma sér vel fyrir hann á 73. breiddargráðu. Þá fékk Paulus fallegan bikar, eftir Valgeir Benediktsson í Árnesi.

Matseðill meistarans

Helgi Ólafsson sigraði á Minningarmóti Páls Gunnarssonar í Djúpavík af miklu öryggi. Hann vann í fyrstu 6 skákunum, og tefldi í senn af snerpu og listfengi.

Fórnarlömbin voru engir aukvisar: Guðmundur Þorsteinsson á Finnbogastöðum, Eiríkur Björnsson, Björn Þorfinnsson, Espen Lund, Arnar Gunnarsson og Jakob Vang Glud.

Í sjöundu umferð lenti Helgi í kröppum sjó gegn Róbert Harðarsyni, sem var skiptamun yfir, þegar friður var saminn í tímahraki.

Í áttundu umferð lagði Helgi Guðmund Kjartansson í snyrtilegri skák og í síðustu umferðinni gerði hann nett jafntefli við danska alþjóðameistarann Simon Bekker-Jensen.

Samtals 8 vinningar í 9 skákum. Átta af andstæðingum Helga hafa alþjóðleg skákstig og höfðu að meðaltali 2372 stig.

Myndin: Róbert stöðvar sigurgöngu Helga í 7. umferð. Friður saminn eftir sviptingar.

Björn í skákheimi

Glæsilegt glertafl eftir Maríu Þorláksdóttur gladdi augu gesta í Skákhöllinni í Djúpavík.

Listakonan var að sýna taflið góða í fyrsta sinn, en það var útskriftarverkefni hennar í Svíþjóð.

Björn Þorfinnsson forseti brosir breitt við skákheimi.

Helgi Ólafsson sigraði með glæsibrag á Minningarmóti Páls Gunnarssonar í Djúpavík

Helgi Ólafsson stórmeistari sigraði með glæsibrag á Minningarmóti Páls Gunnarssonar í Djúpavík nú um helgina. Helgi tapaði ekki skák og hlaut 8 vinninga af 9 mögulegum.

Björn Þorfinnsson var í öðru sæti með 7 vinninga og í 3.-5. sæti urðu Arnar E. Gunnarsson, Simon Bekker-Jensen og Henrik Danielsen með 6,5 vinning.

Mótið var haldið í gömlu síldarverksmiðjunni í Djúpavík og var einstaklega skemmtilegt. Keppendur voru 53 og komu úr öllum áttum, börn og byrjendur, stórmeistarar og stórbændur.

Veitt voru verðlaun í fjölmörgum flokkum og varð Einar K. Einarsson efstur skákmanna með minna en 2200 stig. Björn Torfason bóndi á Melum varð efstur í 2 flokkum, heimamanna og stigalausra skákmanna.

Svanberg Pálsson var efstur barna á grunnuskólaaldri, annar var Nökkvi Sverrisson og þriðja Emma Kamilla Finnbogadóttir.

Guðfríður Lilja Grétarsdóttir varð efst kvenna. Hún gaf verðlaunafé sitt í söfnun til styrktar Guðmundi Þorsteinssyni á Finnbogastöðum, sem missti hús sitt í stórbruna í byrjun vikunnar. Aðrir verðlaunahafar gáfu líka í söfnunina.

Heiðursgestur mótsins var grænlenski pilturinn Paulus Napatoq. Hann er 16 ára, hefur verið blindur frá fæðingu og býr í afskekktasta þorpi Grænlands. Hann tefldi 5 skákir á mótinu í Djúpavík og fékk 3,5 vinning.

Á morgun, sunnudag, verður hraðskákmót í Kaffi Norðurfirði, nýju kaffihúsi Árneshrepps sem opnaði á þjóðhátíðardaginn. Mótið hefst kl. 12 og er öllum opið.

Myndin: Helgi Ólafsson var allan tímann uppi á sviði í síldarverksmiðjunni í Djúpavík. Hér teflir hann við danska alþjóðameistarann Espen Lund. Helgi vann.

Minningarmót Páls Gunnarssonar, lokastaða 1: Helgi Ólafsson, 8 vinninga 2: Björn Þorfinnsson, 7 vinninga 3-5: Arnar Gunnarsson, Simon Bekker-Jensen, Henrik Danielsen, 6,5 vinning 6-8: Espen Lund, Guðmundur Kjartansson, Einar K. Einarsson 6 vinninga 9-11: Magnús Gíslason, Hrannar Jónsson, Svanberg Már Pálsson 5,5 vinning 12-20: Róbert Harðarson, Jakob Fang Glud, Grímur Grímsson, Pétur Atli Lárusson, Hilmar Þorsteinsson, Guðfríður Lilja Grétarsdóttir, Birgir Berndsen, Kjartan Guðmundsson, Páll Sigurðsson 5 vinninga 21-26: Eiríkur Björnsson, Sigurður Sverrisson, Sverrir Unnarsson, Ingþór Stefánsson, Björn Torfason, Gunnar Nikulásson 4,5 vinning o.s.frv.

Kátt í höllinni

Guðfríður Lilja Grétarsdóttir og Bjarnheiður J. Fossdal skemmtu sér dátt í skákhöllinni í Djúpavík.

Báðar eru þær foringjar og félagsmálatröll. Lilja lét af embætti forseta Skáksambands Íslands í vor, og Badda á Melum er allt í öllu í félagsmálum og mannlífi í Árneshreppi.

Mundi og meistarinn

Guðmundur á Finnbogastöðum veltir málunum fyrir sér, rétt áður en skák hans og Helga Ólafssonar stórmeistara hófst í 1. umferð Minningarmóts Páls Gunnarssonar.

Mundi tefldi af fullri einurð gegn Helga, sem er margfaldur Íslandsmeistari. Hann hefur 2 vinninga eftir 4 umferðir.

Helgi hefur fullt hús, 4 vinninga. Á morgun teflir hann við Arnar Gunnarsson sem líka hefur sópað upp öllum tiltækum vinningum.

 

Mikilvægasta fólkið

Svanhildur og Sigrún Baldvinsdóttir unnu ötullega að undirbúningi Minningarmóts Páls Gunnarssonar.

Í fjölmörg horn er að líta þegar stórmót er haldið á afskekktum stað, en Svanhildur og Sigrún leysa allan vanda, með bros á vör.

Skákmótið fór frábærlega af stað og allur undirbúningurinn skilaði sér fullkomlega.

Einsog Boris Spassky sagði: "Mikilvægasta fólkið í skákinni er fólkið sem skipuleggur skákviðburðina."

Listamaður sem gerir ekki jafntefli

Kormákur Bragason sýnir málverk í skákhöllinni í Djúpavík, og er það fyrsta sýningin sem haldin er í hinum glæsilega sal, sem eitt sinn var risastór mjölgeymsla.

Kormáki er margt til lista lagt. Hann er tónlistarmaður og málari, orðhagur mjög og snjall. Hann er ástríðufullur skákmaður og hefur aldrei gert jafntefli.

Óðalsbóndi í sagnaham

Guðmundur Jónsson í Stóru-Ávík fer mikinn á Pálsmótinu og sigraði Kristján á Melum í 4. umferð.

Hér er Guðmundur að rekja gang skákarinnar fyrir Elínu Öglu, skólastjóra í Finnbogastaðaskóla.

Heiðurshjón í heimsókn

Margrét og Gunnsteinn í Norðurfirði heiðruðu skákmótið með nærveru sinni. Margrét stjórnar búðinni í Norðurfirði og Gunnsteinn er aflakló, fræðaþulur og aldursforseti Árneshrepps.

Gunnsteinn sat í sveitarstjórn í 48 ár, sem er Íslandsmet, og var lengstum oddviti Árneshrepps.

Margrét er ættuð frá Stóru-Ávík, systir Guðmundar bónda Jónssonar, sem keppir á Pálsmótinu.

Mikið fjör á Minningarmóti Páls

Helgi Ólafsson og Arnar Gunnarsson eru efstir og jafnir eftir 4 umferðir á Minningarmóti Páls Gunnarssonar í Djúpavík. Róbert Harðarson er í 3. sæti, en alls eru keppendur á mótinu hátt í 60 talsins.

Meðal keppenda eru meistarar, bændur, börn og áhugamenn af öllum stigum.

Teflt er í gömlu síldarverksmiðjunni í Djúpavík, og hefur gömlu mjölgeymslunni verið breytt í glæsilegan skáksal.

Við upphaf mótsins var Guðmundur Þorsteinsson á Finnbogastöðum heiðraður með taflborði, árituðu af Gary Kasparov. Guðmundur sem á mánudaginn missti hús sitt, eignir og innbú í stórbruna er meðal keppenda á mótinu, og hefur staðið sig með prýði.

Mótið heldur áfram á laugardag klukkan 13 og þá verða tefldar 5 umferðir. Sigurvegarinn fær 100 þúsund krónur í sinn hlut og verðlaunagrip úr rekaviði eftir Valgeir Benediktsson í Árnesi.

Samhliða skákmótinu hefur verið sett upp sýning á málverkum Kormáks Bragasonar og þá er til sýnis glertafl unnið af Maríu Þorláksdóttur.

Búast má við æsispennandi keppni á mótinu í Djúpavík í dag, enda eru veitt verðlaun í mörgum flokkum.

Staðan efstu manna, eftir 4 umferðir: 1-2: Helgi Ólafsson og Arnar Gunnarsson, 4 vinninga. 3: Róbert Harðarson, 3,5 vinning 4-11: Simon Bekker-Jens, Jakob Vang Glud, Guðmundur Kjartansson, Espen Lund, Björn Þorfinnsson, Hrannar Jónsson, Pétur Atli Lárusson, Hilmar Þorsteinsson, Grímur Grímsson 3 vinninga 13-15: Birgir Berndsen, Eiríkur Björnsson, Henrik Danielsen, 2,5 vinninga.

Farið yfir stöðuna

Oddviti Árneshrepps, Oddný Þórðardóttir frá Krossnesi, var auðvitað viðstödd setningu Pálsmótsins. Hér er hún ásamt Guðbjörgu Þorsteinsdóttur, húsfreyju í Bæ.

Guðbjörg er systir Guðmundar á Finnbogastöðum, og hún fæddist og ólst upp í húsinu sem brann á mánudaginn.

Skák er skemmtileg

Fjölmargir gestir komu í skákhöllina í Djúpavík á föstudagskvöldið, þegar Pálsmótið hófst.

Hjónin Valgeir Ingólfsson og Hrefna Þorvaldsdóttir í Árnesi skemmtu sér dátt. Valgeir hannaði verðlaunagripinn, sem sigurvegarinn á Pálsmótinu fær.

 

Stórmeistari í ólgusjó

Henrik Danielsen stórmeistari og Róbert Harðarson FIDE-meistari tefldu til þrautar í 4. umferð, og lyktaði spennandi skák með jafntefli.

Róbert er í þriðja sæti eftir 4 umferðir með 3,5 vinning, en stórmeistarinn er í 13.-15. sæti ásamt Birgi Berndsen og Eiríki Björnssyni með 2,5 vinning.

Mundi kominn með tafl frá Kasparov

Við upphaf Minningarmóts Páls Gunnarssonar í Djúpavík var einn af keppendum heiðraður, Guðmundur Þorsteinsson bóndi á Finnbogastöðum.

Íbúðarhúsið á Finnbogastöðum brann til kaldra kola, en Guðmundur komst með naumindum úr eldinum. Allt brann, nema eitt viskastykki sem Guðmundur notaði sem skýluklút í reyknum.

Hrafn Jökulsson færði Guðmundi gjöf frá Hróknum, taflborð áritað af Gary Kasparov fv. heimsmeistara, ásamt eðalskáksetti.

Guðmundur tefldi við Helga Ólafsson stórmeistara í 1. umferð mótsins, og sýndi hinum margfalda Íslandsmeistara harða mótspyrnu. Mundi fékk 2 vinninga af 4, og skemmti sér konunglega, einsog aðrir keppendur á Pálsmótinu.

Milli Hrafns og Munda sjást meistarar tveir: Guðmundur í Ávík og Helgi Ólafsson.

Við minnum á söfnun Félags Árneshreppsbúa til styrktar Guðmundi Þorsteinssyni á Finnbogastöðum. Reikningsnúmer: 1161-26-001050 Kennitala: 4510892509

Bændur að tafli

 

Björn Torfason á Melum og Ingólfur Benediktsson í Árnesi tefldu hörkuskák í 4. umferð. Melabóndi hafði betur eftir mikinn atgang.

Fjær sjást Kristján Albertsson á Melum og Guðmundur Jónsson í Stóru-Ávík. Þar hafði Ávíkurbóndi betur, og er á mikilli siglingu.

Skákveislan að hefjast

Minningarmót Páls Gunnarsson í Djúpavík hefst klukkan 20 í kvöld. Allt er til reiðu í skáksalnum í gömlu síldarverksmiðjunni og fyrstu skákmennirnir eru mættir á staðinn. Framundan er skákveisla í Árneshreppi á Ströndum.

Keppendur sem leggja af stað frá höfuðborgarsvæðinu nú í dag ættu að gefa sér a.m.k. 5 klukkustundir. Best er að aka sem leið liggur yfir Holtavörðuheiði og þaðan til Hólmavíkur. Frá Hólmavík til Djúpavíkur er ríflega klukkustundar akstur. Leiðin er mjög falleg, svo vonandi gefur fólk sér tíma til að njóta ferðarinnar.

Alls verða tefldar 9 umferðir á Minningarmóti Páls og eru vegleg verðlaun í mörgum flokkum. Meðal þeirra sem gefa verðlaun eru Forlagið, 66° Norður og Sparisjóður Strandamanna. Forlagið leggur m.a. til eintök af nýrri og stórglæsilegri ljósmyndabók Sigurgeirs Sigurjónssonar, Hestar. Þá verða munir eftir Valgeir Benediktsson í Árnesi í verðlaun, meðal annars pennar úr rekaviði í fallegum öskjum.

Í kvöld verða tefldar 4 umferðir með 15 mínútna umhugsunartíma. Á morgun byrjar taflmennskan klukkan 13 og þá verða tefldar 5 umferðir. Að þeim loknum er verðlaunaafhending og síðan tekur við grillveisla á Hótel Djúpavík.

Á sunnudag verður hraðskákmót klukkan 12 í Kaffi Norðurfirði. Það verða svo Gamlir fóstbræður sem slá botninn í skákhátíðina með söngveislu klukkan 14.

Myndin: Hróksmennirnir Birgir Berndsen, Kjartan Guðmundsson, Flovin Þór Naes og Páll Gunnarsson taka við gullinu fyrir sigur í 4. deild 2004. Birgir og Kjartan komu fyrstir manna til Djúpavíkur og verða meðal keppenda á Minningarmóti Páls um helgina.

Danskir meistarar í Djúpavík

Þrír danskir alþjóðameistarar mæta til leiks á Minningarmót Páls Gunnarssonar í Djúpavík. Þetta eru þeir Jakob Vang Glud (2456 Elo-stig), Espen Lund (2420) og Simon Bekker-Jensen (2392).

Þeir eru meðal keppenda á alþjóðlegu skákmóti sem Taflfélag Reykjavíkur stendur fyrir, en hlé er gert á mótinu svo danska tríóið geti teflt í Djúpavík.

Alls eru hátt í 50 keppendur búnir að skrá sig. Heimamenn í Árneshreppi tefla fram vaskri sveit á mótinu. Þegar eru skráð til leiks Ingólfur Benediktsson, Róbert Ingólfsson og Númi Ingólfsson frá Árnesi, Björn Torfason, Árný Björnsdóttir og Kristján Albertsson frá Melum, Guðmundur Þorsteinsson frá Finnbogastöðum og Guðmundur Jónsson frá Stóru-Ávík, og má gera ráð fyrir fleiri skráningum nú á lokasprettinum.

Myndin: Mundi á Finnbogastöðum og Guðfinna á Kjörvogi að tafli á einu af skákmótum Hróksins í Trékyllisvík.