Skákhátíð í Árneshreppi

Helgi Ólafsson stórmeistari sigraði á Minningarmóti Guðmundar Jónssonar, sem haldið var í Djúpavík laugardaginn 20. júní. Mótið var fjölmennt, fjörugt og tókst framúrskarandi vel. Stórmeistarar röðuðu sér í fjögur efstu sætin, en verðlaun voru veitt í mörgum flokkum.

Minningarmót Guðmundar Jónssonar var haldið í gömlu síldarverksmiðjunni í Djúpavík, sem breytt hafði verið í sannkallaða skákhöll.

Jafnframt var opnuð sýning á ljósmyndum dr. Kára Stefánssonar úr ríki fjörunnar. Myndir Kára er í senn hrífandi og glæsilegar og veittu keppendum góðan innblástur yfir taflborðinu.

Helgi Ólafsson tefldi af miklu öryggi og fékk 8 vinninga af 9 mögulegum. Næstur kom Þröstur Þórhallsson, sem var í efsta sæti um hríð, og þriðji varð Jóhann Hjartarson.

Sigurvegari í kvennaflokki varð Erla Margrétar Gunnarsdóttir,  Gabríel Kári Mánason sigraði í flokki grunnskólabarna og Jón Gunnar Jónsson hlaut flesta vinninga skákmanna með minna en 2100 stig. Hrafn Jökulsson sigraði í flokkum heimamanna og stigalausra skákmanna.

Þá voru veitt sérstök verðlaun fyrir háttvísi, og þau komu í hlut Vigfúsar Vigfússonar, hins nýja formanns Hellis sem þótti sýna mikinn drengskap á mótinu. Verðlaunin voru ekki af lakari endanum, ljúffengt lambalæri frá Melum í Árneshreppi. Best klæddu keppendurnir voru valdir Elvar Guðmundsson og Erla Margrét Gunnarsdóttir.

Fyrir sigurinn á Minningarmóti Guðmundar Jónssonar hlaut Helgi Ólafsson 50 þúsund krónur og stórbrotinn verðlaunagrip eftir Guðjón Kristinsson frá Dröngum. Um er að ræða skúlptúr, unninn úr rekaviði, vel á annan metra á hæð og þurfti fjóra vaska menn til að bera hann inn í skáksalinn. Margir aðrir vinningar á skákhátíðinni voru ættaðir úr Árneshreppi, hannyrðir og listmunir, gisting og siglingar, svo nokkuð sé nefnt.

Við segjum fleiri fréttir af mótinu og skákhátíðinni í Árneshreppi á næstu dögum.

Lokastaðan á Minningarmóti Guðmundar Jónssonar:

1. sæti: Helgi Ólafsson (2522 stig) 8 vinningar.

2. sæti: Þröstur Þórhallsson (2442) 7,5 vinningar. 

3. sæti: Jóhann Hjartarson  (2596)  7 vinningar.

4. sæti: Henrik Danielsen (2482)  6,5 vinningar.

 5.-8. sæti:  Pétur Atli Lárusson (2128), Áskell Örn Kárason  (2239), Gylfi Þórhallson (2232),  Jón Gunnar Jónsson  (1660) 6 vinningar.

9.-14. sæti:  Guðmundur Gíslason (2351), Björn Þorfinnsson  (2422), Elvar Guðmundsson                  (2324), Gunnar Björnsson (2135), Árni Ármann Árnason (2142)  Jorge Fonseca (2040)  5,5 vinningar.

15.-21. sæti: Vigfús Óðinn Vigfússon  (2051), Magnús Gíslason  (1980), Daði Guðmundsson (1950), Gísli Gunnlaugsson (1830), Hrafn Jökulsson, Stefán Karlsson, Hallgrímur Guðmundsson 5 vinningar.

22.-25. sæti: Jakob Thorarensen, Bragi Halldórsson (2238), Arngrímur Þór Gunnhallsson (1955), Gunnar Nikulásson (1550)  4,5 vinningar.

 26.-34. sæti: Atli Viðar Thorstensen, Jóhann Örn Bjarnason, Ólafur Thorarensen, Ingólfur Benediktsson, Gunnar Dalkvist, Kristján Albertsson, Erla Margrét Gunnarsdóttir, Gabríel Máni Kárason, Guðmundur Rafn Guðmundsson  4 vinningar.

35.-37. sæti: Andri Thorstensen, Viðar Gylfason, Ásrún Bjarnadóttir 3,5 vinningar.

38.-41. sæti: Nökkvi Mikaelsson, Saga Kjartansdóttir, Björn Torfason, Unnur Jóna Stefánsdóttir 3 vinningar.

42. sæti:   Júlíana Lind Guðlaugsdóttir  2,5 vinningar.

43.-44. sæti: Magni Snær Kjartansson, HafsteinnÞór Hafsteinsson 2 vinningar.

45. sæti: Ástrós Guðmundsdóttir 1 vinningur.

Sigurlaunin á Minningarmóti Guðmundar Jónssonar frá Stóru-Ávík eru engin venjuleg dós: Skúlptúr eftir Guðjón Kristinsson frá Dröngum, unninn úr rekaviðadrumbi.

Guðjón kom með gripinn í Djúpavík á föstudagskvöldið og þurfti að kalla til fíleflda burðarmenn til að koma listaverkinu í skáksalinn.

Guðjón er útskurðarmeistari og sérfræðingur í handverki og vinnubrögðum fyrri tíma. Hann þykir öðrum snjallari í hleðslu úr torfi og grjóti, einsog verk hans víða um lönd bera vitni.

Guðmundur í Stóru-Ávík og Guðjón voru stórfrændur og vinir, og sagði listamaðurinn að sér væri heiður og ánægja að leggja til sigurlaun til minningar um góðan dreng. Um skúlptúrinn sagði Guðjón, að hann ætti að endurspegla tvær hliðar Guðmundar heitins: harðjaxlinn og blíðlynda húmoristann.

Skákhátíð í Árneshreppi hefst í dag og eru veðurguðir í sólskinsskapi af því tilefni. Von er á mörgum góðum gestum, stórmeisturum sem byrjendum, sem munu etja kappi við vaska sveit heimamanna.

Hátíðin verður sett í gömlu síldarverksmiðjunni í Djúpavík klukkan 20 í kvöld, föstudag. Teflt verður í glæsilegum og óvenjulegum skáksal, sem forðum var mjölgeymsla í stærstu verksmiðju á Íslandi. Eftir setningarathöfn verður slegið upp tvískákmóti, þar sem tveir eru saman í liði.

Á morgun, laugardag klukkan 12, hefst Minningarmót Guðmundar Jónssonar frá Stóru-Ávík. Guðmundur, sem lést í apríl, var mikill skákáhugamaður og lét sig aldrei vanta á skákþingum. Meðal keppenda á mótinu verða fjórir stórmeistarar, þeir Jóhann Hjartarson, Helgi Ólafsson, Henrik Danielsen og Þröstur Þórhallsson.

Mótið er öllum opið og þátttaka er ókeypis. Tefldar verða 9 umferðir með 10 mínútna umhugsunartíma.

Til mikils er að vinna og verðlaun glæsileg. Sigurvegarinn hlýtur 50 þúsund krónur og skúlptúr eftir Guðjón Kristinsson frá Dröngum. Meðal annarra vinninga er listaverk úr rekaviði eftir Valgeir Benediktsson í Árnesi, margskonar handverk og hannyrðir eftir íbúa í Árneshreppi, sigling á Hornstrandir, gisting í Hótel Djúpavík og gistiheimilum Árneshrepps og lambalæri frá Melum.

Þá eru vinningar frá Forlaginu, Henson, Skugga, 66° Norður, Kaupfélagi Steingrímsfjarðar, Ungmennafélaginu Leifi heppna og Jóhanna Travel, sem leggur til arabískar slæður og sjöl. Sérstök verðlaun eru fyrir bestan árangur barna, heimamanna og stigalausra. Síðast en ekki síst verða best klæddu keppendurnir verðlaunaðir, auk þess sem veitt eru sérstök háttvísisverðlaun.

Á sunnudaginn klukkan 13 verður svo hraðskákmót í Kaffi Norðurfirði. Tefldar verða 6 umferðir með 5 mínútna umhugsunartíma.

Þetta er annað árið í röð sem skákhátíð er haldin í Árneshreppi.

Allir eru hjartanlega velkomnir!

Búið er að panta mest allt gistirými í Árneshreppi um helgina, svo gestir skákhátíðarinnar ættu að bregðast við skjótt, eigi þeir eftir að tryggja sér gistingu.

Tvö herbergi eru enn laus á Hótel Djúpavík (sími 4514037) en nóg pláss er í svefnpokagistingu í húsi Ferðafélags Íslands í Norðurfirði.

Gestir á skákhátíð þurfa aðeins að greiða 2500 krónur fyrir nóttina í Norðurfirði. Aðstaðan er mjög góð, umhverfið fagurt og örstutt í verslun og kaffihús. Hafið samband við Laugu í Norðurfirði í síma 4514017 -- sem fyrst!

Skráningum á mótið fjölgar stöðugt og má búast við a.m.k. 40-50 keppendum í afskekktustu (og fegurstu) sveit landsins.

Veðurspáin er góð.

Keppendur á Minningarmóti Guðmundar Jónssonar á laugardaginn ættu að hafa í huga að dómnefnd velur best klæddu keppendurna, karl og konu (eða strák og stelpu), sem fá sérstök verðlaun. Bryddað var upp á þessari skemmtilegu nýbreytni á síðasta ári.

Þá var Guðfríður Lilja Grétarsdóttir valin best klæddi keppandinn, enda í þjóðlegum og fallegum fatnaði, sem hentaði vel til taflmennsku í gömlu síldarverksmiðjunni.

Skráning og upplýsingar hjá Róbert Lagerman (sími 6969658, chesslion@hotmail.com) og Hrafni Jökulssyni (4514026 og hrafnjokuls@hotmail.com).

Jóhann Hjartarson stórmeistari, stigahæsti meistari íslenskrar skáksögu, verður meðal keppenda á Minningarmóti Guðmundar Jónssonar frá Stóru-Ávík, sem haldið verður í Djúpavík, laugardaginn 20. júní.

Mótið er öllum opið og er þátttaka ókeypis. Keppendur eru hvattir til að skrá sig sem fyrst. Hægt er að bóka gistingu í samráði við skipuleggjendur eða á eftirtöldum stöðum:

Verðlaun eru sannarlega glæsileg.

Auk 100 þúsund króna verðlaunapotts eru fjöldi góðra vinninga. Þar má nefna skúlptúr eftir Guðjón frá Dröngum, listmun eftir Valgeir í Árnesi, siglingu fyrir tvo norður að Horni, silfurnisti eftir Jóhönnu í Árnesi, gistingu í Norðurfirði, Hótel Djúpavík og sundlaugarhúsinu Krossnesi, landsins besta lambakjöt frá Melum, slæður frá Persíu og Arabíu, hannyrðir Selmu á Steinstúni, málsverð fyrir tvo í Kaffi Norðurfirði,  og bækur frá Forlaginu og Skugga.

Með hátíðinni núna viljum við heiðra minningu Guðmundar Jónssonar í Stóru-Ávík, sem jafnan var hrókur alls fagnaðar á skákþingum einsog öðrum mannmótum.

Við leiðum saman heimamenn og gesti, stráka og stelpur, mjóa og feita, unga og gamla. Allt í samræmi við kjörorð FIDE og Hróksins: Við erum ein fjölskylda.

Stórmeistarinn Henrik Danielsen sigraði á hraðskákmóti Hróksins í Kaffi Norðurfirði á þriðja og síðasta degi skákhátíðar í Árneshreppi.

34 keppendur mættu til leiks í Kaffi Norðurfirði, nýjum veitingastað í Árneshreppi sem opnaði 17. júní. Henrik, sem var stigahæstur, leyfði aðeins eitt jafntefli; gegn alþjóðameistaranum Arnari Gunnarssyni. Einar Valdimarsson deildi 2.-3. sæti með Arnari og er það skemmtilegur árangur hjá þeim harðsnúna skákmanni.

Henrik hlaut peningaverðlaun fyrir sigurinn og hina glæsilegu ljósmyndabók Sigurgeirs Sigurjónssonar, Hestar, sem er nýkomin út hjá Forlaginu.

Vel fór um keppendur í Kaffi Norðurfirði, enda ilmandi vöfflur og fleira góðgæti á boðstólum. Staðarhaldarar, Edda Hafsteinsdóttir og Guðlaugur Ágústsson, fengu taflsett að gjöf í tilefni af opnun staðarins og því geta skákmenn jafnan tekið eina bröndótta þegar leiðin um Strandir.

Og það verður áreiðanlega fyrr en síðar: Skákhátíðin í Árneshreppi 2008 lukkaðist frábærlega, og þegar hefur verið ákveðið að endutaka leikinn á næsta ári.

Lokastaðan í hraðskákmóti Hróksins í Kaffi Norðurfirði:

1. sæti: Henrik Danielsen 5,5 vinningar 2.-3. sæti: Arnar Gunnarsson, Einar Valdimarsson 5 vinninga 4.-10. sæti: Páll Sigurðsson, Svanberg Pálsson, Nökkvi Sverrisson, Einar K. Einarsson, Ingþór Stefánsson, Kjartan Guðmundsson, Pétur Atli Lárusson 4 vinninga 11.-12. sæti: Sigurður Sverrisson, Eiríkur Björnsson 3,5 vinning 13.-22. sæti: Hrannar Jónsson, Halldór Blöndal, Sverrir Unnarsson, Pétur Blöndal, Kormákur Bragason, Hreinn Ágústsson, Gunnar Nikulásson, Ægir Ingólfsson, Lilja Grétarsdóttir, Arnar Valgeirsson 3 vinninga  23.-24. sæti: Paulus Napatoq, Róbert Ingólfsson 2,5 vinning 25.-29. sæti: Ingólfur Benediktsson, Kristján Albertsson, Guðmundur R. Guðmundsson, Sóley Pálsdóttir, Björn Torfason 2 vinninga 30.-32. Júlíana Guðlaugsdóttir, Guðmundur Jónsson, Andri Thorstensen 1,5 vinning 33.-34. sæti: Númi Ingólfsson, Ásta Ingólfsdóttir 1 vinning.

Árný Björnsdóttir frá Melum stóð sig með miklum sóma á Minningarmóti Páls Gunnarssonar í Djúpavík. Hér stýrir hún hvítu mönnunum gegn Guðmundi í Stóru-Ávík, og lyktaði skákinni með jafntefli eftir sviptingar.

Við hlið hennar situr Stefán Herbertsson og teflir við Paulus Napatoq, heiðursgest hátíðarinnar. Þar hafði Paulus öruggan sigur.

Hér eru nokkrir harðsnúnir. Fremst sitja Kjartan Guðmundsson og Grímur Grímsson, þar sem Grímur hafði sigur eftir harðan atgang.

Einar K. Einarsson lagði listamann hátíðarinnar, Kormák Bragason. Einar vann góðan sigur í flokki skákmanna með minna en 2200 stig, og sigraði meistarana Róbert Harðarson og Jakob Vang Glud.

Við enda borðsins grillir í Hrannar Jónsson, sem tefldi af alkunnri einurð og festu.

Eva hótelhaldari í Djúpavík tók vel á móti gestum skákhátíðarinnar, og allt gistirými í gamla síldarþorpinu var notað.

Hótel Djúpavík er tvímælalaust eitt skemmtilegasta hótel á landinu, og þótt víðar væri leitað.

Eva og Ásbjörn staðarhaldari unnu ötullega að undirbúningi stórmótsins og leystu öll mál sem leysa þurfti.

Þegar er byrjað að undirbúa skákhátíð í Djúpavík 2009...

Björn Torfason bóndi á Melum var eini tvöfaldi sigurvegarinn í Djúpavík. Hann varð efstur í flokki stigalausra skákmanna, sem og í flokki Strandamanna.

Skæðasti keppinautur Björns var Ingólfur Benediktsson í Árnesi, sem varð í 2. sæti í báðum flokkunum.

Aðrir heimamenn á mótinu voru Kristján Albertsson, Róbert Hlífar Ingólfsson, Númi Ingólfsson, Árný Björnsdóttir, Guðmundur Jónsson, Guðmundur Þorsteinsson, Ásta Þorbjörg Ingólfsdóttir.